शनिबार परेको वर्षातका कारण बीपी राजमार्ग स्थित विभिन्न स्थानमा डाइभर्सन बागएपछि पूर्णरुपमा अवरुद्ध भएको सडक दुई दिनपछि यातायातका साधन पुनः सञ्चालनमा आएको छ । रोशी खोलाको बाढीले बीपी राजमार्गको चौकी डाडा, घुमाउने, चार सय बेसी, गिम्दी वेसी, नार्के चिउरीबास बोक्सीकुना, कालढुङ्गा, डालावेसी र माम्तीमा डाइभर्सन बगाएको थियो । भक्तपुर सडक डिभिजनका प्रमुख सुमन योगेशले बीपी राजमार्ग क्षतिभएको डाइभर्सन निर्माणसँगै सोमबार ३ बजेबाट अवरुद्ध सडकमा यातायातका साधन पुनः सञ्चालनमा आएको बताउनुभयो । यसैगरी नेपालथोक र सिन्धुलीतर्फ आँपघारी क्षेत्रमा पनि डाइभर्सन बगाएको छ ।
    रोशी खोलाको मुहान क्षेत्रमा ठूलो वर्षात पर्दा पानीको थप वहावको कारण डाइभर्सन बगाएर लगेको कुरा सडक डिभिजन प्रमुख योगेशले जनाउनुभयो । दीर्घकालिन रुपमा सडक बनाइरहेको छ, १ महिना भित्र उक्त क्षेत्रमा सडक बनि सक्ने आगामी असार सम्ममा सडकमा समस्या नआउने उहाँले बताउनुभयो । रोशी गाउँपालिका अध्यक्ष दिनेश लामाले बीपी राजमार्ग बाहैं महिना सञ्चालन हुने वातावरण तयार गर्न छिटोभन्दा छिटो पूनः निर्माण सक्ने गरी थप उपकरण र जनशक्तिको उचित प्रबन्धको लागि गाउँपालिकाले संघ सरकारलाई ध्यानाकर्षण गरेको बताउनुभयो ।
    २०८१ असोज महिनाको दोस्रो सातामा आएको भीषण बाढीले बिपी राजमार्गको भकुन्डेदेखि नेपालथोकसम्म करिब २८ किलोमिटर सडक खण्डमा क्षति पु¥याएको थियो । क्षतिग्रस्त क्षेत्रमा हाल पुनर्निर्माण कार्य जारी रहे पनि पूर्णरूपमा स्थायी संरचना निर्माण हुन बाँकी छ । अस्थायी समाधानका रूपमा रोशी खोलाको किनार हुँदै डाइभर्सन निर्माण गरी यातायात सञ्चालन गरिँदै आएको छ । त्यो पनि बाढीले बगाइदिँदा यातायात अवरुद्ध हुने र यात्रीहरुले सास्ती पाउने क्रम जारी रहेको छ ।