सामुदायिक बचत तथा ऋण सहकारी संस्था लिमिटेड पनौतीको ३२औँ वार्षिक साधारणसभा सम्पन्न भएको छ । संस्थाको वार्षिक साधारणसभामा सञ्चालक समितिका पदाधिकारी, शेयर सदस्य तथा सरोकारवालाहरूको सहभागितामा संस्थाको वार्षिक गतिविधि, आर्थिक अवस्था, प्रगति र आगामी कार्ययोजनाबारे छलफल गरिएको थियो । साधारणसभामा संस्थाका अध्यक्ष मुकुन्द शर्माले अध्यक्षको प्रतिवेदन प्रस्तुत गर्दै संस्थाले सञ्चालन गरेका गतिविधि, उपलब्धि, चुनौती तथा आगामी योजनाबारे जानकारी गराउनुभएको थियो । उहाँले सहकारी संस्थाको विकास र दिगोपनका लागि शेयर सदस्यहरूको विश्वास, सक्रिय सहभागिता र संस्थाप्रतिको सदभाव र विस्वास कायम रहेको बताउनुभयो ।
त्यसैगरी, संस्थाका सचिव सरोजकुमार तिमल्सिनाले सचिवको वार्षिक प्रतिवेदन प्रस्तुत गर्नुभएको थियो । प्रतिवेदनमा संस्थाका गतिविधि, प्रशासनिक कार्यसम्पादन, सदस्यसँगको सम्बन्ध तथा संस्थागत व्यवस्थापनका विषय समेटिएका थिए । सभामा कोषाध्यक्ष कृष्ण थापाले संस्थाको वार्षिक आय–व्यय विवरण प्रस्तुत गर्नुभएको थियो । उहाँले संस्थाको आर्थिक कारोबार, आम्दानी तथा खर्चको विवरणसहित आर्थिक अवस्थाबारे शेयर सदस्यहरूलाई जानकारी गराउनुभएको थियो ।
सहकारी क्षेत्रप्रति पछिल्लो समय आम नागरिकको चासो र अपेक्षा बढिरहेको सन्दर्भमा संस्थाले सदस्यहरूको बचत सुरक्षालाई प्राथमिकतामा राख्दै पारदर्शी आर्थिक कारोबार, सुशासन र जवाफदेहितालाई व्यवहारमा लागू गर्नुपर्ने आवश्यकता पनि औँल्याइएको थियो । सहकारी संस्थाको मूल उद्देश्य सदस्यहरूबीच आपसी सहयोग, सहकार्य र आर्थिक आत्मनिर्भरता अभिवृद्धि गर्नु भएकाले संस्थाको विकासमा सञ्चालक समिति मात्र नभई सम्पूर्ण शेयर सदस्यहरूको साझा जिम्मेवारी रहने औलाइएको थियो ।
३२औँ वार्षिक साधारणसभाले संस्थाको विगतका गतिविधिको समीक्षा गर्नुका साथै आगामी दिनमा संस्थालाई अझ व्यवस्थित, पारदर्शी, उत्तरदायी र सदस्यकेन्द्रित बनाउँदै लैजाने सन्देश दिएको छ । लामो समयदेखि सहकारी अभियानमा क्रियाशील सामुदायिक बचत तथा ऋण सहकारी संस्थाको संस्थागत विकास, सदस्यको आर्थिक सशक्तीकरण र सहकारीको मूल्य, मान्यता तथा सिद्धान्तको संरक्षणमा साधारणसभा महत्वपूर्ण अवसरका रूपमा रहेको छ । कुल ६१ हजार ६ सय ६५ सदस्य रहेको सहकारीको शेयर रकम ४४ करोड ५१ लाख ३ हजार ८ सय, बचत रकम ४ अर्ब ५३ करोड ८८ लाख ९४ हजार ७ सय, ऋण लगानी ४ अर्ब ४ करोड ११ लाख ७४ हजार ८० रहेको जनाएको छ । संस्थाका प्रमुख कार्यकारी अधिकृत मदन बस्नेतले संस्थाले नीति विधि र प्रविधिको उच्चतम प्रयोग गरी आर्थिक सुशासन कायम गरी सदस्यहरुको वृहत्तर आर्थिक विकास गरेको जनाउनुभयो । संस्थाले मोबाइल बैकिङ, एस.एमएस सेवा, सदस्य मृत्यू राहत, सदस्यहरुलाई सदस्य स्वास्थ्य औषधी उपचार सेवा प्रदान गर्दै आएको छ ।
