इन् वर्षा नानी खुलुखुलु पखालेर धरती शरत् हाँस्तै आयो सबसित लगाएर पिरती सफा चिल्ला राम्रा तरु वनहरू पात हरिया फलेका छन् नाना फलफुलहरू टम्म रसिला । सकी खेती पाती कृषकजनले फुर्सत लिए घट्यो चर्को गर्मी न त छ सरदी ठिक्क समय यही मौका पारी घर घर दसैं आगमन भो खुशीको वेलामा जुरुजुरु यसै नाच्न मन भो । जगन्माता सृष्टि स्थिति प्रलय गर्ने भगवती उनै काली वाणी सहित धनलक्ष्मी शुभ गति गरी पूजा आजा जगमग उमारेर जमरा यही माग्छौं आमा छ र करुणता प्रेम छहरा । विदेशै लागेका जन पनि बिदा ली घर फिरे अनेकौं कोसेली सहित धनलक्ष्मी घर भरे टिका थाप्छन् ठूला जनसित शुभाशीर्वचन ली शुभेच्छा है भन्छन् परिचितहरूसाथ निहुरी । मिठो खाने राम्रो पहिरन लिने यो समय हो घृणा ईष्र्या बिर्सी मिलजुल हुने यो समय हो सबैमा फैलाई विनय समता प्रेम करुणा दसैं राम्रो पारौं अझ सुख थपौं जीव जगमा । (काठमाडौँ बसोबास गर्ने कविको जन्म काभ्रे जिल्लाको खकुरेल बेसीमा भएको हो ।)
